دبئی میں ڈلیوری بائیکس کے لیے اسمارٹ مانیٹرنگ سسٹم 2027 سے لازمی ہوگا

دبئی میں ڈلیوری بائیک چلانے والی کمپنیوں کے لیے ایک اسمارٹ مانیٹرنگ سسٹم متعارف کرایا جا رہا ہے۔ اس سسٹم کے تحت کمپنیوں کو اپنے بیڑے میں ٹریکنگ ڈیوائسز نصب کر کے انہیں ایک ڈیجیٹل پلیٹ فارم سے منسلک کرنا ہوگا۔ 2027 کے پہلے چھ ماہ تک یہ عمل اختیاری رہے گا، جس کے بعد لازمی ہوگا۔ اس سسٹم میں انٹرنیٹ آف تھنگز ڈیوائسز، جدید کیمرے اور اسمارٹ پلیٹ فارم شامل ہے، جو رفتار، اچانک بریک اور ڈرائیونگ کے انداز پر نظر رکھے گا۔ اس اقدام سے کمپنیوں کو اپنے رائیڈرز کی کارکردگی اور خطرناک ڈرائیونگ کی نشاندہی میں مدد ملے گی۔ آر ٹی اے کے مطابق اس سے سروس کا معیار اور سڑکوں پر سیفٹی بہتر ہوگی۔ یہ خبر ای آر اے نیوز گلف نے دی ہے۔